Gəncədə narkotik vasitə saxlamaqda və satmaqda şübhəli bilinən şəxslər saxlanılıblar. Bu haqda 2 fevral tarixində Oxu.az-a istinadən məlumat veririk.
Baş Polis İdarəsinin əməkdaşları əməliyyatlar keçiriblər. Nəticədə külli miqdarda narkotik vasitə dövriyyədən çıxarılıb. Əməliyyatların birində Samir Hüseynov adlı şəxs saxlanılıb. Onun üzərinə baxış keçirilən zaman 0.3 qram çəkidə metamfetamin (patı) aşkar edilib. Məlum olub ki, ona narkotik maddəni tanışı Mətləb adlı şəxs 10 manata satıb. Davam etdirilən əməliyyat tədbirləri nəticəsində narkotik maddə əldə edib saxlamaqda şübhəli bilinən şəhər sakini Mətləb Əliyev saxlanılaraq polis bölməsinə gətirilib. Onun üzərindən 0.33 qram metamfetamin aşkar edilərək götürülüb.
Digər tədbirlər nəticəsində narkotik vasitə əldə edib saxlamaqda şübhəli bilinən şəhər sakini İqbal Əlisgəndərov saxlanılıb. Polis idarəsində üzərinə baxış keçirilən zaman onda 1.25 qram heroin aşkar edilib. Növbəti əməliyyat-axtarış tədbirləri nəticəsində şəhər sakini Asif Bağırov da saxlanılıb və üzərindən 0.2 qram heroin tapılaraq götürülüb.
Bundan başqa, narkotik maddə əldə edib saxlamaqda şübhəli bilinən keçmiş məhkum Hüseyn Allahverdiyev də saxlanılıb. Onun üzərinə baxış keçirilən zaman 3.17 qram çəkidə metamfetamin aşkar edilərək götürülüb.
Faktlarla bağlı araşdırmalar davam etdirilir.
