Goranboy şəhər 2 saylı tam orta məktəbin direktor əvəzi vəzifəsindən azad edilmiş İlhamə Qasımova məktəb əmlakını sökərək evinə aparması ilə bağlı iddialara cavab verib.
İlhamə Qasımova Gencexeber.az-a açıqlamasında əvvəlcə məktəbdə quraşdırılmış müşahidə kameralarından danışıb.
Onun sözlərinə görə, məktəbdə 32 kamera olub və onları öz hesabına quraşdırıb:
"Məktəbə 32 kamera mən quraşdırmışdım. Kameralar mənim telefonumda və evimdəki aparatda izlənilirdi. Mən məktəbdən ayrıldıqdan sonra rəhbərlik tərəfindən mənə dedilər ki, kameraları söküm. Mən də kameraları sökdüm".
Keçmiş direktor sanitar qovşağındakı avadanlıqların sökülərək aparılması ilə bağlı iddiaları da rədd edib. O, məktəbin təhvil-təslim aktının olduğunu vurğulayıb:
"Məktəbin sanitar qovşağı neçə ildir həmin vəziyyətdədir. İndi bilmirlər kameranı nə formada desinlər, nə desinlər. Elə deyirlər ki, bunu məktəbin əmlakı ilə bağlayaq. Mən məktəbi təhvil-təslim etmişəm. Təhvil-təslim aktında məktəb başqa direktora verilibsə, orada hər hansı söküntü, dağıntı və ya avadanlığın əskikliyi olsaydı, mən buna görə cavab verməli idim. Əgər bunlar yoxdursa, bunların heç biri olmayıbsa, bu haradan çıxdı?"
Keçmiş direktor sonda sanitar qovşağı ilə bağlı yayılan məlumatların onun fəaliyyətinin gözdən salınması məqsədi daşıdığını düşündüyünü bildirib.
