Gəncədə törədilən cinayətin məhkəmə prosesi başa çatıb. Bu haqda 9 fevral tarixində Qafqazinfo.az-a istinadən xəbər veririk.
Hadisə ötən ilin mart ayında baş verib. 41 yaşlı Ruslan Şirinov keçmiş heyat yoldaşı Züleyxanı iş yerində 16 bıçaq zərbəsi vuraraq öldürməkdə şübhəli bilinərək saxlanılıb.
Faktla bağlı Gəncə Ağır Cinayətlər Məhkəməsində keçirilən prosesdə Ruslan Şirinov Cinayət Məcəlləsinin xüsusi amansızlıqla adam öldürmə maddəsi ilə təqsirli bilinib. Cinayətkara məhkəmənin hökmü ilə 16 il həbs cəzası verilib. O, cəzasını ciddi rejimli müəssisədə çəkəcək.
Qeyd edək ki, Züleyxa Şirinova ilə Ruslan Şirinov ailəli olublar. İki övladı olan cütlüyün 2020-ci ildən etibarən münasibətləri tədricən pozulub. Həmin ərəfədə qadın Bakıda yaşadıqları evi tərk edərək Gəncəyə, anasının yanına köçüb. Lakin Ruslan Züleyxa ilə əlaqəni kəsməyib. Bir müddət sonra keçmiş xanımının Gəncədə marketlərdən birində çalışdığını öyrənən Ruslan Şirinov onun işdən çıxmasını tələb edib. Barışmaq və işdən çıxmaqla bağlı tələblərinin yerinə yetirilmədiyini görən şəxs daha sonra bıçaq götürərək Züleyxanın iş yerinə gedib. O, marketə daxil olaraq heç bir söhbət etmədən hücum edərək insanların gözü qarşısında Züleyxaya 16 bıçaq zərbəsi endirib. Qadın aldığı xəsarətlərdən hadisə yerində ölüb.
