Bir müddət əvvəl Mərkəzi Qan Bankının Anton Çexov küçəsində yerləşən Gəncə bölməsinin binasının acınacaqlı vəziyyətdə olması ilə bağlı redaksiyamız tərəfindən məqalə hazırlanmışdı. Səhiyyə nazirliyindən bildirilmişdi ki, Gəncə Qan Bankının binasının təmir-tikintiyə ehtiyacı olması ilə bağlı Səhiyyə Nazirliyi məlumatlıdır.
Gencexeber.az-a Gəncə şəhər İcra Hakimiyyətindən bildirilib ki, məsələ hazırda gündəmdədir və həlli istiqamətində aparılan danışıqlar davam etdirilir.
Eyni zamanda Gəncə şəhərindəki Park-bulvar ərazisini əhatə edən dekorativ döşəmələrdə çökmə əmələ gəlib, bu da təhlükəsizlik baxımından ciddi problem yaradır. Bulvar ərazisində axşam saatlarında işıqlandırılma da olmur.
Gəncə İH-dən saytımıza bildirilib ki, cari il ərzində Gəncə şəhərində həyata keçiriləcək genişmiqyaslı abadlıq-quruculuq işləri çərçivəsində "Gəncəçay" Park-Bulvar Kompleksinin də təmiri nəzərdə tutulub.
Nizami Gəncəvinin əsərlərini simvollaşdıran “Xəmsə” kompleksi isə həm yerli sakinlər, həm də turistlər üçün vacib bir mədəni məkan olsa da, hazırda bərbad vəziyyətdədir.
Abidənin baxımsız vəziyyətdə olması ilə bağlı açıqlama verən adıçəkilən qurum qeyd edib ki, cari il ərazində sözügedən ərazidə də abadlıq işlərinin görülməsi və abidələrin bərpası nəzərdə tutulub.
