Göygöldə qonşular uzunqulağa görə dalaşıblar.
Gencexeber.az-ın əldə etdiyi məlumata görə, hadisənin istintaqı Göygöl Rayon Məhkəməsində keçirilib.
Belə ki, Göygöl rayonunda yaşayan Elnur Məmmədov (ad şərtidir) təsərrüfatla məşğul olmaqla Gəncə bazarında məhsullarını sataraq ailəsini dolandırır. O, sahibi olduğu uzunqulağı yaşadığı evin qarşısındakı otluğa cidarlayıb.
Heyvanın çıxardığı səslər yaxınlıqda yerləşən ev sakinlərini narahat edib. Elə bu səbəbdən Elnurun qonşusu, zərərçəkmiş Namiq Əliyev (ad şərtidir) onun evinə gələrək uzunqulağın çıxardığı səsə irad bildirib. Bununla da aralarında mübahisə yaranıb və Elnur Məmmədov qonşusunu döyüb.
Elnur Məmmədov Azərbaycan Respublikası CM-nin 128-ci (sağlamlığa zərbə vurma) maddələri ilə təqsirləndirilib.
Məhkəmədə ifadə verən Elnur Məmmədov özünü ittiham üzrə təqsirli bilib:
“Namiqin yaşadığı yerlə evimin arasında 100 metr məsafə var. Onunla aramızda olan mübahisəyə səbəb evimin yaxınlığında olan boş torpaq sahəsində uzunqulağının otlaması oldu. Namiq evimin qarşısına gələrək uzunqulağın səsinin onu narahat etdiyini bildirdikdə ona bir saat sonra heyvanı başqa yerə aparacağımı dedim. Lakin bununla razılaşmadı. Dərhal uzunqulağı oradan aparmağımı istədi. Sərxoş olduğunu bildiyim üçün söhbəti çox uzatmadım, dedim ki, sonra danışarıq. Amma Namiq söyüş söyməyə başladı. Bu zaman aramızda mübahisə yarandı və mən də onu döydüm”.
Məhkəmə iclasında zərərçəkmiş Namiq Əliyev ifadəsində göstərib ki, Elnur mütəmadi olaraq uzunqulağı onun evinin yaxınlığına otlamağa buraxır:
“Qonşu olduğumuz üçün ona demədən bir neçə dəfə uzunqulağı bağlandığı yerdən açıb buraxmışam. Gözləyirdim ki, insanlara narahatlıq verdiyini özü anlasın. Lakin uzunqulağı açdıqdan sonra Elnur həmin heyvanı bu səfər mənim evimin darvazasının qarşısına bağladı. Bunun səbəbini soruşmaq üçün onlara getdim. İradımı bildirdikdə mübahisə yarandı və Elnur məni döyməyə başladı”.
İş materiallarına əlavə edilmiş arayışdan görünür ki, təqsirləndirilən Elnur Məmmədovun himayəsində 2010 və 2009-cu il təvəllüdlü 2 azyaşlı uşağı var.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Əli Məmmədov 6 ay müddətində azadlıqdan məhrum edilib.
Fidan İlqar
