Son illər ölkənin bir sıra şəhər və rayonlarında yas mərasimləri zamanı həddindən artıq xərc tələb edən ehsan süfrələrinin qarşısının alınması məqsədilə maarifləndirici tövsiyələr irəli sürülür, bəzi bölgələrdə isə bu yanaşma artıq tətbiq olunur. Oxşar təşəbbüs Gəncə şəhərində də gündəmə gətirilib.
Gencexeber.az məlumat verir ki, bu istiqamətdə Qafqaz Müsəlmanları İdarəsinin (QMİ) Gəncə bölgəsi üzrə qazisi, "İmamzadə ziyarətgah" kompleksinin imamı Hacı Tahir Abbasov tərəfindən Gəncə şəhər ictimaiyyətinə müraciət ünvanlanıb.
Müraciətdə din xadimi şəhər sakinlərini, yerli din xadimlərini, icra hakimiyyəti nümayəndələrini, hüquq-mühafizə orqanlarının rəhbərlərini və fərdi sahibkarları yas mərasimlərinin sadə və israfdan uzaq şəkildə keçirilməsinə dəstək verməyə çağırıb. Bildirilib ki, bu təşəbbüs yalnız maddi yükün azaldılmasına deyil, eyni zamanda cəmiyyətdə sosial həmrəyliyin və dini dəyərlərin qorunmasına xidmət edir.
Hacı Tahir Abbasovun sözlərinə görə, QMİ-nin Qazılar Şurası tərəfindən dəfələrlə tövsiyə olunan bu yanaşma həm dini baxımdan məqbul, həm də sosial cəhətdən vacib hesab olunur. O vurğulayıb ki, yas mərasimlərinin mahiyyəti mərhumun xatirəsinin ehtiramla yad edilməsi və ailəyə mənəvi dəstəyin göstərilməsidir; dəbdəbəli süfrələr isə bu məqsədə xidmət etmir.
