Gəncədə yataqxanaların yararsız, bir çoxunun isə qəzalı vəziyyətdə olması artıq heç kimə sirr deyil. Bu vəziyyətdən təkcə sakinlər deyil, şəhər rəsmiləri və aidiyyəti qurumlar da agahdırlar.
Gencexeber.az-ın məlumatına görə, son illərdə təhlükə mənbəyinə çevrilən bu binalarda yaşamaq sözün həqiqi mənasında mümkünsüzə dönüb. Divarları çatlayan, dam örtüyü sıradan çıxan və kommunikasiya xətləri yararsız hala düşən yataqxanalarda hələ də çox sayda ailələr yaşayır.
Belə ki, Gəncə Şəhər İcra Hakimiyyəti yanında Mənzil Kommunal Təsərrüfatı İstehsalat Birliyinin balansında təxminən 20-yə yaxın yataqxana binası mövcuddur. Onlardan təqribən 15-i qəzalı və tam yararsız vəziyyətdədir.
Bu yataqxanalarda əsasən sovet dövründə Gəncənin zavod və fabriklərində çalışan şəxslər ailələri ilə birlikdə məskunlaşıb. Onların bir hissəsi artıq dünyasını dəyişsə də, övladları və yaxınları hələ də həmin binalarda yaşayır.
Problemin həlli ilə bağlı müxtəlif təkliflər səsləndirilsə də, əsas müzakirə mövzusu həmin binalarda daimi qeydiyyatda olan sakinlərin köçürülməsidir. Belə ki, Gəncə şəhərinin Bakı istiqamətində giriş hissəsində məhz bu kateqoriyadan olan ailələr üçün Gəncə Şəhər İcra Hakimiyyəti tərəfindən yeni bina inşa olunub.
Sakinlərin sözlərinə görə, yerli qurumlar onlara dəfələrlə köçürülmə ilə bağlı vədlər versələr də, illərdir real addım atılmayıb:
"Yoxlayırlar, evlərə baxış keçirirlər, amma sonra yenə sükut. Hər dəfə deyirlər ki, "tezliklə köçürüləcəksiniz", amma o "tezlik" bir neçə ildir gəlmir."
Gəncə şəhər İcra Hakimiyyəti yanında Mənzil-Kommunal Təsərrüfatı İstehsalat Birliyindən bildirilib ki, ilkin mərhələdə ən qəzalı binaların sakinlərinin köçürülməsi nəzərdə tutulur. Məlumata görə, prosesin bu ilin sonunadək başlanacağı planlaşdırılır.
Sakinlər isə bu dəfə də verilən vədlərin elə kağız üzərində qalmasından narahatdırlar.
