Gəncədə Mirzə Şəfi Vazeh, 103 ünvanında yerləşən avtobus dayanacağının mövcud vəziyyəti əhalinin narazılığına səbəb olur.
Gencexeber.az-a şikayət ünvanlayan sakinlər bildirib ki, dayanacaqda onların avtobus gözləməsi və nəqliyyata rahat şəkildə minməsi üçün heç bir şərait yaradılmayıb.
Ərazi ağaclarla əhatə olunduğundan, səki yoxdur, ətraf isə palçıq və torpaqdır.
Nəticədə sərnişinlər avtobus gözləyərkən palçığın içində dayanmağa, yaxud təhlükəsizliklərini riskə ataraq avtomobil yoluna çıxmağa məcbur olurlar. Bu vəziyyət xüsusilə yağışlı havalarda həm çətinlik yaradır, həm də piyadaların təhlükəsizliyi baxımından ciddi narahatlıq doğurur.
Sakinlər aidiyyəti qurumlardan dayanacaq ərazisində səki salınmasını, pavilyon yerləşdirilməsini xahiş edirlər.
Məsələ ilə bağlı Gəncə şəhər İcra Hakimiyyətinə sorğu ünvanlanıb.