Gəncə sakini Bakıda fəaliyyət göstərdiyi iddia olunan bir neçə sosial şəbəkə səhifəsi vasitəsilə uşaq geyimlərinin satışı adı altında dələduzluq edildiyini bildirir.
Gencexeber.az-a müraciət edən Çiçək Zeynalın sözlərinə görə, "TikTok"da mütəmadi satış videoları paylaşan "Baby Rich Official" adlı mağaza səhifəsindən Gəncəyə çatdırılma da daxil olmaqla, ümumilikdə 180 manat dəyərində uşaq geyimi sifariş edib və qarşı tərəfin təqdim etdiyi bank kartına köçürüb.
Onun sözlərinə görə, sifarişin səhər tezdən göndəriləcəyi vəd edilsə də, ertəsi gün mağaza tərəfindən telefon nömrəsi bloklanıb.
Çiçək Zeynal qeyd edib ki, məsələ ilə bağlı Kəpəz Rayon Polis Şöbəsinə şikayət edib.
O bildirib ki, başqa telefon nömrəsi ilə həmin səhifələrə müraciət etdikdə də alış-veriş üçün eyni ünvan təqdim olunub. Lakin göstərilən ünvanda mağazanın olmadığı üzə çıxıb.
Şikayətçinin iddiasına görə, satışla məşğul olan şəxslər ödənişləri qəbul etmək üçün müxtəlif bank kartlarından istifadə edirlər.
Çiçək Zeynal həmçinin "Babybrand 1", "Baby Rich Official" və "Premium Kids" adlı səhifələrin eyni şəxslər tərəfindən idarə olunduğunu və oxşar üsulla alıcıların aldadıldığını iddia edir.
Qeyd edək ki, redaksiyamız tərəfindən sözügedən mağaza səhifələrində qeyd olunan əlaqə nömrələri ilə əlaqə saxlamağa cəhd edilib. Lakin qarşı tərəf məsələyə münasibət bildirməkdən kobu şəkildə imtina edib.
Məsələ ilə bağlı Daxili İşlər Nazirliyinin (DİN) Mətbuat Xidmətinin regional qrupundan redaksiyamızın sorğusuna cavab olaraq bildirilib ki, şikayətçinin müraciəti əsasında araşdırma aparılır. Araşdırmanın nəticələrinə uyğun olaraq, məsələyə hüquqi qiymət veriləcək.