Gəncədə Cümhuriyyətin üçrəngli bayrağı ilk dəfə 1918-ci ildə, növbəti dəfə isə 71 il sonra – 1989-cu ilin noyabrında qaldırılıb.
Gencexeber.az məlumat verir ki, 1989-cu ildə Gəncədə Azərbaycanın üçrəngli bayrağını ilk dəfə Gəncə şəhər İcra Hakimiyyəti binasının üstünə sancan Milli Azadlıq Hərəkatının iştirakçıları Məmməd Əmrahov və Vüqar Musayev olub.
Bayraqdar Məmməd Əmrahov ölkə mediası ilə bu haqda bölüşdüyü xatirəsində bildirmişdi ki, Gəncədə Meydan Hərəkatının ildönümü ilə bağlı mitinq keçirilirdi: "Şəki İpək Fabrikində dostlarımızın köməkliyi ilə ipəkdən Milli bayrağımızı tikdirmişdik. Nə olur olsun, bayrağı bu gün Gəncə şəhər İcra Hakimiyyətinin üzərinə sancmağa qərar vermişdik. Həmin gün… mən və əqidədaşım rəhmətlik Vüqar Musayev İcra Hakimiyyətinin binasının üstünə çıxdıq. İlk öncə Azərbaycan Sovet bayrağını çıxartdıq, sonra İcra Hakimiyyətinin üzərindəki sovet gerbini və kommunist şüarlarını qırıb dağıdaraq yerə atdıq. Və nəhayət, milli bayrağımızı binanın üstündəki dirəyə sancdıq… Çox qürurluyam ki, bu tarixi hadisəni həyata keçirmək məhz mənə qismət oldu".
Ehtiyatda olan polis polkovniki Yusif Məmmədov isə həmin günlər barədə danışarkən qeyd etmişdir ki, ölkələrin, dövlətlərin bayrağı onların onurğa sütunudur: "Siz bilirsiniz ki, Gəncə həmişə rus imperializminə qarşı müqavimət göstərib. Sovet hökumətinə qarşı 1988-ci ildən başlayan xalq hərəkatında gəncəlilər öndə gedirdilər… Bəli, bayrağımız bayraqdarlarımızın sayəsində məhz 1989-cu ildə ilk dəfə Gəncədə dalğalandı…".