Gəncə şəhərinin Mehdi Hüseynzadə küçəsində yaşayanlar yolun yararsız vəziyyətdə olması ilə bağlı narazılıqlarını bildirirlər.
Gencexeber.az-a müraciət edən sakinlərin sözlərinə görə, təxminən bir il əvvəl sözügedən yaşayış massivində su və kanalizasiya xətlərinin çəkilişi zamanı asfalt örtüyü dağıdılıb. Lakin layihə başa çatdıqdan sonra qazılan ərazilərdə asfalt örtüyü bərpa edilməyib.
Nəticədə sakinlər ciddi problemlərlə üzləşiblər. Onların sözlərinə görə, yolun yararsız vəziyyətdə olması həm avtomobillərin, həm də piyadaların hərəkətini çətinləşdirir. Dəfələrlə aidiyyəti qurumlara müraciət edilsə də, problemin həlli istiqamətində hələlik nəticə əldə olunmayıb.
Analoji vəziyyət Mehdi Hüseynzadə küçəsinin yaxınlığında yerləşən, Aida İmanquliyevanın adını daşıyan yaşayış massivində də müşahidə olunur.
Məsələ ilə bağlı Gəncə Şəhər İcra Hakimiyyətindən bildirilib ki, içməli su və çirkab su xətlərinin yeniləndiyi ərazilərdə asfaltlanma işlərinin aparılması nəzərdə tutulub.
Həmçinin qeyd olunub ki, küçə işıqlandırılması sistemlərinin yenilənməsi şəhərdə həyata keçirilən abadlıq və quruculuq işləri çərçivəsində mərhələli şəkildə icra olunacaq.