Avropa Yenidənqurma və İnkişaf Bankının "Yaşıl şəhərlər" proqramı çərçivəsində Gəncə Şəhər İcra Hakimiyyətinin həyata keçirdiyi "Gəncə şəhərində bərk məişət tullantılarının idarəedilməsi" layihəsi üzrə yeni müqavilə imzalanıb.
Gencexeber.az bildirir ki, reallaşdırılan layihə çərçivəsində "Gəncə Avtomobil Zavodu" İstehsalat Birliyi ilə bağlanmış müqaviləyə əsasən, şəhərin kommunal təsərrüfatının maddi-texniki bazasının gücləndirilməsi məqsədilə 32 ədəd xüsusi təyinatlı nəqliyyat vasitəsi satın alınır.
İtaliyanın "Iveco" markalı avtomobillərinin şassisi əsasında hazırlanacaq texnikaların 29 ədədi müxtəlif ölçülü tullantı toplama maşınlarından (kompaktorlardan), 1 ədədi tullantı konteynerlərinin yuyulması üçün xüsusi sistemlə təchiz edilmiş avtomobildən, 1 ədədi küçə süpürən maşından, 1 ədədi isə irihəcmli tullantı konteynerlərinin daşınması üçün nəzərdə tutulmuş texnikadan ibarətdir.
