Gəncə şəhərinin Gülüstan qəsəbəsində kanalizasiya problemi əhalini təngə gətirib.
Gencexeber.az-a müraciət edən sakinlərin sözlərinə görə, Nəcəf bəy Vəzirov küçəsində kanalizasiya xətti daşıb və çirkab suları küçə boyunca axaraq ərazini palçığa qərq edib.
Vətəndaşlar bildirirlər ki, ətrafa yayılan üfunət səbəbindən pəncərələri açmaq, hətta küçədə hərəkət etmək belə çətinləşib. Habelə iddia olunur ki, aidiyyəti quruma müraciət edilsə də, indiyədək əraziyə baxış keçirilməyib və problem aradan qaldırılmayıb.
Küçə sakinləri yaranmış vəziyyətin xüsusilə uşaqların sağlamlığı və ətraf mühit üçün təhlükə yaratdığını bildirərək problemin qısa zamanda həllini tələb edirlər.
Məsələ ilə bağlı redaksiyamız tərəfindən İri Şəhərlərin Birləşmiş Su Təchizatı Xidmətinə sorğu ünvanlanıb.
