"Qazaxda futbola maraq kifayət qədər yüksəkdir və hazırda müxtəlif yaş qruplarında 100-dən çox uşaq bu idman növü ilə məşğul olur".
Bu sözləri Qazaxın "Göyəzən" futbol komandasının baş məşqçisi Süleyman Məmmədov müsahibəsində deyib.
Mütəxəssis bölgədə uşaq futbolunun inkişafından, komandanın maddi-texniki bazasından, sponsor çatışmazlığından, ev oyunlarını Tovuzda keçirmək məcburiyyətində qalmasından danışıb.
- Qazax rayonunda uşaqların futbola marağı hansı səviyyədədir?
- Bilirsiniz ki, qərb bölgəsi futbol bölgəsidir. Rayonumuzda futbola maraq çox böyükdür. Hazırda 100-dən çox uşağımız futbolla məşğul olur. Qızlardan ibarət komandamızın olması da futbola marağın yüksək olduğunu göstərir.
- "Göyəzən"in maddi-texniki bazası hansı vəziyyətdədir?
- Biz oyunlarımızı Qazaxın mərkəzi stadionunda keçirirdik. Hazırda həmin stadion Həmkarlar İttifaqının balansında olduğu üçün müəyyən çətinliklərlə üzləşirik. Hətta Region Liqasında çıxış edən komandamız da orada ev oyunlarını keçirə bilmir. Mövsümün açılış oyununu keçirmək üçün Tovuza getməli olduq. AFFA ilə Həmkarlar İttifaqı arasında danışıqlar aparılır. Federasiya çalışır ki, ev oyunlarımızı yenidən Qazaxda keçirə bilək.
- Stadiondan istifadə ilə bağlı müqavilənin müddətinin uzadılmamasının səbəbi nədir?
- 23 il ərzində "TuranBank" bizə sponsorluq edib. Həmin müddətdə stadionun icarə haqqını da onlar ödəyirdilər. Nə qədər vəsait ödənildiyindən xəbərimiz yoxdur. Artıq sponsorumuz olmadığı üçün icarə haqqını ödəyə bilmirik. Bizə bildirirlər ki, müqavilə bağlanmalı və icarə haqqı ödənilməlidir.
Mənbə: idman.biz
