Bu gün Azərbaycan teatr və kino sənətinin görkəmli nümayəndəsi, Gəncədə dünyaya gələn aktrisa Amaliya Pənahovanın anım günüdür.
Gencexeber.az məlumat verir ki, Amaliya Əliş qızı Pənahova 1945-ci ildə Gəncədə anadan olub. On yaşında ailəsi ilə Bakıya köçüb. 1964-cü ildən teatr və kino sahəsində fəaliyyət göstərən aktrisa ömrü boyu 500-dən artıq obraz yaradıb.
18 yaşında İlyas Əfəndiyevin "Sən həmişə mənimləsən" tamaşasında Nargilə roluna dəvət olunub. Tofiq Kazımovun quruluşunda hazırlanan tamaşa ona böyük uğur gətirib. Tomris, Natəvan, Medeya, Burla Xatun, Məhsəti və Ofeliya obrazları isə aktrisaya geniş populyarlıq qazandırıb.
Amaliya Pənahova 1974-cü ildə Əməkdar artist, 1985-ci ildə Xalq artisti fəxri adlarına layiq görülüb. 1968 və 1972-ci illərdə dövlət mükafatları alıb. 1982-ci ildə ilin aktrisası elan edilib.
Aktrisa rejissor kimi də fəaliyyət göstərib, 12 televiziya və teatr tamaşasına quruluş verib. 1992-ci ildə Bakı Bələdiyyə Teatrını yaradıb və uzun müddət onun rəhbəri olub. Azərbaycan Dövlət Mədəniyyət və İncəsənət Universitetində professor kimi dərs deyib.
2000–2005-ci illərdə Milli Məclisin deputatı olan Amaliya Pənahova 2013-cü ildə sənətşünaslıq elmləri doktoru elmi dərəcəsini alıb.
Şəxsi həyatı ilə də diqqət çəkən aktrisa həyat yoldaşı Yusiflə sənətə başladığı illərdə tanış olub. Onların bir oğlu və bir qızı dünyaya gəlib.
Amaliya Pənahova Azdramada səhnələşdirilən "Təhminə və Zaur" tamaşasında Təhminə rolunu ifa edib. Zaur obrazını canlandıran Fuad Poladovla aralarında olan incikliyə baxmayaraq, aktyorun təşəbbüsü ilə barışaraq birlikdə səhnəyə çıxıblar. Tamaşa teatr tarixinin uğurlu səhnə əsərlərindən birinə çevrilib.
Ömrünün son illərində plastik əməliyyatları və görünüşü ilə bağlı yayılan fotolar da müzakirələrə səbəb olub. Aktrisa həmin fotoların yayılmasından narazılığını açıq şəkildə ifadə edib.
Amaliya Pənahova 2018-ci il noyabrın 8-də, 73 yaşında xərçəng xəstəliyindən vəfat edib. Qurd Qapısı qəbiristanlığında dəfn olunub.
