Gəncə şəhər sakinləri şəhərdə fəaliyyət göstərən poliklinikaların telefon xidmətlərindən narazıdırlar.
Vətəndaşlar Gencexeber.az-a ünvanladıqları şikayətlərdə iddia edirlər ki, bir sıra poliklinikaların qaynar xətt nömrəsi ümumiyyətlə yoxdur. Əlaqə nömrəsi olan tibb müəssisələrində isə edilən zənglərə cavab verilmir.
Sakinlərin sözlərinə görə, həkim qəbuluna yazılmaq, müayinə ilə bağlı məlumat almaq və digər məsələləri dəqiqləşdirmək üçün poliklinikalarla əlaqə saxlamaq ciddi problemə çevrilib. Vətəndaşlar dəfələrlə zəng etmələrinə baxmayaraq, qarşı tərəfdən cavab ala bilmədiklərini iddia edirlər.
Şikayətçilər bildirirlər ki, müasir dövrdə insanların ən sadə məlumatı əldə etmək üçün poliklinikaya şəxsən getməyə məcbur qalması qəbuledilməzdir.
Sakinlər aidiyyəti qurumlardan məsələyə aydınlıq gətirilməsini, poliklinikaların əlaqə nömrələrinin ictimaiyyət üçün əlçatan olmasını istəyirlər. Məsələ ilə Tibbi Ərazi Bölmələrini İdarəetmə Birliyinə (TƏBİB) sorğu ünvanlanıb.
