Gədəbəydə 17 yaşlı qızı evlənmək niyyəti ilə qaçıran nişanlısı, onun qardaşı və anası cinayət məsuliyyətinə cəlb edilib.
Gəncə Ağır Cinayətlər Məhkəməsində bu iş üzrə hökm elan edilib.
32 yaşlı Emin qaçırdığı Ayşənlə (şərti) bir müddət əvvəl nişanlanıb. Dediyinə görə, qızın yetkinlik yaşına çatmadığından xəbəri olmayıb. Emin qardaşı Naib vasitəsilə qızla tanış olub. Naib də elə Ayşənin bacısı ilə evlənmək üzrə olub.
Lakin sonradan iki qardaş və ana birləşib Ayşəni qaçırmaq qərarına gəliblər. Qızın anasının polisə şikayətindən sonra o, evə qaytarılıb. Bu məsələdən sonra Ayşənin bacısı ilə digər qardaşın da münasibəti pozulub.
Hər iki qardaşa Cinayət Məcəlləsinin 144.3-cü maddəsi ilə ittiham verilib. Eyni maddə ilə ittiham olunan ana barəsində isə həbslə bağlı olmayan qətimkan tədbiri seçilib.
Emin ifadəsində nişanlısının 18 yaşı olduğunu polisdə öyrəndiyini, ondan niyə şikayət etdiyini isə hələ də bilmədiyini deyib.
Məhkəmə yekunda müttəhimləri adam oğurluğunda təqsirli bilib. Amma hakim hadisənin ilkin motivinin adam oğurluğu deyil, ailə qurma niyyəti ilə bağlı olmasını, zərərçəkmiş şəxslə barışıq əldə edilməsini yumşaldıcı hal hesab edib.
Hökmə əsasən, Eminə 2, qardaşına 1 il 6 ay həbs cəzası verilib. Anaya isə sınaq müddəti seçilməklə 10 il şərti cəza təyin edilib.
Mənbə: qafqazinfo.аz
