Gəncədə çoxmənzilli yaşayış binasında kommunal qəza baş verib.
Gencexeber.az məlumat verir ki, hadisə şəhərin Atatürk prospekti, 4 ünvanında qeydə alınıb.
Belə ki, binanın novdanlarından biri qırılıb. Nəticədə yağış suları 5-ci mərtəbədən başlayaraq mənzillərə dolub. Su binanın 3-cü və 4-cü mərtəbələrində yerləşən mənzillərə də keçib.
Sakinlərin ciddi narazılığına səbəb olan hal artıq bir müddətdir davam edir. Bildirilir ki, aidiyyəti qurumlara şikayət olunması baxmayaraq, hazırda problem həll olunmamış qalır.
Məsələ ilə bağlı redaksiyamız tərəfindən Gəncə Şəhər İcra Hakimiyyətinə sorğu ünvanlanıb.