Tovuz rayonunda 24 yaşlı kişi sevgilisini öldürməkdə ittiham edilib.
Tovuz rayon sakini, 2002-ci il təvəllüdlü Sərxanla yaxın münasibətdə olduğu, 1990-cı il təvəllüdlü Rəvanə ilə (adlar şərtidir) aralarında şəxsi münasibətlər zəminində mübahisə yaranıb.
Sərxan atasına məxsus "Hyundai Sonata" markalı avtomobillə Rəvanəni faktiki yaşadığı ünvandan götürərək Tovuz rayonunda yerləşən əkin sahəsinə aparıb. Avtomobilin yük yerində olan iki litrlik plastik qabda saxladığı benzini qadının üzərinə töküb, alışqanla onu yandırıb. Rəvanə aldığı yanıq xəsarətləri nəticəsində ölüb.
Sərxan barəsində Cinayət Məcəlləsinin 126.3-cü maddəsi ilə ittiham elan edilib. Sərxan ona elan olunmuş ittiham üzrə özünü təqsirli bilməyib.
O, ifadəsində bildirib ki, 2024-cü ildə işdən evə qayıdanda atası Mehdi mərhum Rəvanə ilə hansı münasibətdə olduğunu soruşub və gələcəyinin yaxşı olması üçün onunla əlaqələrini kəsməsini istəyib.
Təqsirləndirilən şəxsin sözlərinə görə, hadisədən əvvəl səhər tezdən Rəvanə yenidən ona zəng edib və harada olduğunu soruşub:
"Mən obyektdə olduğumu və bir azdan oranı açacağımı dedim. Rəvanə son dəfə məni görmək istədiyini dedi və həmişə söhbət etdiyimiz yerə getməyi təklif etdi. Mən də avtomobili oraya sürdüm. Çatdıqda avtomobili saxlayaraq saxlanc yerindən siqaretlə alışqanı götürdüm və siqaretimi yandırdım. Həmin vaxt Rəvanə artıq avtomobildən düşmüşdü. Avtomobildən düşəndən sonra Rəvanənin üzərinə benzin tökdüyünü gördüm. Rəvanənin özünü yandırmasına səbəb kimi məndən ayrılmaq istəməməsini düşünmüşəm".
Gəncə Ağır Cinayətlər Məhkəməsinin hökmü ilə Sərxan 9 il müddətinə azadlıqdan məhrum edilib. Birinci instansiya məhkəməsinin hökmündən təqsirləndirilən şəxs və onun müdafiəçisi tərəfindən apellyasiya şikayətləri verilib. Gəncə Apellyasiya Məhkəməsinin qərarı ilə şikayətlər təmin edilməyib.
Mənbə: pravda.аz