"Kəpəz" və "Qarabağ" futbol klubları arasında noyabrın 22-də Misli Premyer Liqasının XII turu çərçivəsində Gəncə şəhər stadionunda keçiriləcək oyuna azarkeşlərin marağı böyükdür.
Gencexeber.az-a bu barədə Gəncə təmsilçisinin mətbuat xidmətindən məlumat verilib.
Bildirilib ki, qarşılaşmaya biletlərin satışa çıxarıldığı ilk gündə rekord göstərici qeydə alınıb. Belə ki, cəmi 1 sutka ərzində 8400 bilet satılıb. Bu, 15 363 tamaşaçı tutumuna malik stadionun ümumi yerlərinin təxminən 55 faizi deməkdir.
Qeyd edilib ki, satış bu templə davam edərsə, oyuna qədər bütün biletlərin satılacağı gözlənilir.
Xatırladaq ki, cari mövsümdə "Kəpəz"in ev oyunlarında qeydə alınan ən yüksək azarkeş sayı sentyabrın 4-də "Şamaxı" ilə görüşdə olub. Həmin qarşılaşmanı 15 000 tamaşaçı izləyib. Lakin həmin qarşılaşmadan fərqli olaraq, bu dəfə cəmi bir sutka ərzində stadionun mövcud yerlərinin yarısından çoxuna bilet satılıb.