Gəncə şəhərinin Sevinc qəsəbəsində antisanitariya yaranıb.
Gencexeber.az-a daxil olan şikayətə əsasən, Ülfət Abbasov küçəsində 16 nömrəli avtobus marşrutunun dayanacağının yaxınlığında, əsas yolun kənarında iri buynuzlu mal-qaranın ifrazatları atılır. Sözügedən tullantılar digər məişət tullantıları ilə birlikdə yandırılır.
Nəticədə əraziyə yayılan kəskin üfunət sakinlərin gündəlik həyatına mənfi təsir göstərir. Vətəndaşlar pis qoxuya görə pəncərələrini aça bilmədiklərini, sərnişinlər isə avtobus gözləyərkən ciddi narahatlıq yaşadıqlarını bildirirlər.
Sakinlər aidiyyəti qurumların əraziyə baxış keçirməsini, tullantıların təmizlənməsini və bu cür halların qarşısının alınmasını istəyirlər.
Qeyd edək ki, məsələ ilə bağlı Mənzil Kommunal Təsərrüfatı İstehsalat Birliyinə (MKTİB) sorğu ünvanlanıb.