Gəncənin iki küçəsində işıqlandırma sisteminin işləməməsi sakinlərin narazılığına səbəb olub.
Gencexeber.az-a müraciət edən vətəndaşların sözlərinə görə, Təbriz küçəsində bir aydan çoxdur küçə işıqları yanmır. Gülüstan qəsəbəsinə aparan yolda, Molla Cəlilli küçəsində isə bir həftədir işıqlandırma yoxdur.
Sakinlər bildirirlər ki, şəhərin gediş-gəlişin intensiv olduğu küçələrinin qaranlıq qalması həm piyadalar, həm də sürücülər üçün ciddi təhlükə yaradır.
Vətəndaşlar yolu keçərkən çətinlik çəkir, sürücülər isə qaranlıq səbəbindən hər an qəza baş verə biləcəyindən narahat olurlar.
Şikayətçilər aidiyyəti qurumlardan sözügedən ərazilərdə küçə işıqlandırmasının bərpa olunmasını tələb edirlər.
Qeyd edək ki, məsələ ilə bağlı Mənzil Kommunal Təsərrüfatı İstehsalat Birliyinə (MKTİB) sorğu ünvanlanıb.