Gəncəli şəhid Orxan Əsgərovun nəşi iki il öncə Azərbaycan torpağına tapşırılıb.
Gencexeber.az məlumat verir ki, 27 yanvar 2023-cü il tarixində Azərbaycan Respublikasının İran İslam Respublikasındakı Səfirliyinə həyata keçirilən hücum nəticəsində vəfat edən mühafizə xidmətinin rəisi Orxan Əsgərov 29 yanvar 2023-cü il tarixində Azərbaycana gətirilib.
Növbəti gün mərhumun nəşi Təzəpir məscidindən qardaşının Yasamal rayonunda yerləşən evinə aparılıb. Mərasimdə mərhumun ailə üzvləri ilə yanaşı, ictimaiyyət nümayəndələri, rəsmilər, daxili işlər naziri Vilayət Eyvazov, müdafiə naziri Zakir Həsənov, Dövlət Təhlükəsizliyi Xidmətinin rəisi Əli Nağıyev, Xarici Kəşfiyyat Xidmətinin rəisi Orxan Sultanov, müdafiə sənayesi naziri Mədət Quliyev, Türkiyənin Azərbaycandakı səfiri Cahid Bağcı və digərləri iştirak ediblər.
Əsgərovun xatirəsinə ehtiram əlaməti olaraq 3 dəfə yaylım atəşi açılıb, Azərbaycanın Dövlət Himni səsləndirilib. O, Bakıda İkinci Şəhidlər xiyabanında dəf edilib.
Qeyd edək ki, Orxan Rizvan oğlu Əsgərov 1982-ci ilin 5 noyabr tarixində Gəncədə dünyaya gəlib. Baş leytenant O.Əsgərov Azərbaycan Respublikasının İran İslam Respublikasındakı Səfirliyinin Mühafizə Xidmətinin rəisi vəzifəsində çalışıb.
Hadisənin baş verdiyi gün şəhid elan edilən Orxan Əsgərov 3 fevral 2023-cü ildə Azərbaycan Respublikası Prezidentinin sərəncamı ilə ölümündən sonra “Vətən uğrunda” medalı ilə təltif edilib.
