Gəncədə şəhidlərə həsr olunan mahnıya klip çəkilib. Gencexeber.az musiqi əsərini ifa edən 22 yaşlı gənc müğənni Mövlud Pərviz oğlu Zalı ilə həmsöhbət olub.
Müsahibəni təqdim edirik:
- Söhbətimizə şəhidlərin xatirəsinə oxuduğunuz mahnıdan başlamaq istərdik.
- Allah bütün şəhidlərimizə rəhmət etsin. 1995-ci ildə lentə alınan “Ağ atlı oğlan” filmində səslənən musiqidir. Bu mahnının bəstəkarı Oqtay Rəcəbovdur.
- Deyirlər, gəncəlilər yerlipərəstdir. Musiqiyə olan sevginiz doğma şəhərinizlə bağlı ola bilərmi?
- Xeyr, yerlipərəst olduğumuzu heç düşünmürəm. Mən bu şəhərdə böyüyüb, boya-başa çatmışam. Təhsilim də bu şəhərdə olub. İlk olaraq Gəncə şəhəri 4 saylı uşaq musiqi məktəbini bitirmişəm. Piano vokal ixtisası üzrə 2019-cu ildə Gəncə Musiqi Kollecinin vokal ixtisasına qəbul olmuşam. Əslində, hər iki təhsil ocağında vokal ixtisasının təhsilini almışam. Amma ki, səhnə aldığım məkanlarda estrada şanson mahnıları ifa edirəm.
- Gəncədə klip çəkmək ideyası necə yarandı? Gəncənin Şəhidlər Xiyabanı şəxsən sizin üçün nə deməkdir?
- Gəncə Şəhidlər Xiyabanı şəxsən mənim üçün iftixar və qürur yeridir. Allah şəhidlərimizə rəhmət etsin, qazilərimizə şəfa versin. 30 illik həsrətə son qoyan igidlər hər zaman qəlbimizdə yaşayacaqlar.
Klip və bu layihə öz ideyam idi. Bu işdə mənə təmənnasız dəstək olan yoldaşlarıma təşəkkür edirəm.
- Adətən yaxınlarımızın vəfatından sonra, yaşa dolduqca dəyərlərini daha çox anlayırıq. Sizcə, itkinin acısını musiqi vasitəsilə çatdıra bildinizmi?
- Xeyir, düşünürəm ki, heç bir canlı varlığın itkisini musiqi ilə təsəlli etmək olmaz. İtkinin acısını musiqi vasitəsi ilə çatdırıb və ya çatdıra bilmədiyimə, düşünürəm ki, dinləyicilərim qərar verər.
- Adınızı şou xəbərlərində görməmişik. Sakit həyata üstünlük verən gənc təsiri bağışlayırsınız. Ehtimalımız düzdür?
- Şən və pozitiv bir insanam. Sadəcə son illərdə tam fərqli olaraq şou xəbərlərə qarışmıram. Nəzərə alsanız ki, mən əsasən “YouTube” platformasında bir neçə kanallarda şou xarakterli efirlərdə müəyyən zamana kimi iştirak etmişəm.
- Azərbaycanda musiqiçilərin fəaliyyət istiqamətləri müxtəlifdir. Siz hansı sahəni seçmisiniz?
- Böyük səhnələrdə, o cümlədən Heydər Əliyev adına Respublika sarayında iki dəfə fərqli konsertlərdə səhnə almışam.
Dəyərli musiqiçilərimiz və müğənnilərimiz 1 ilin 12 ayını toy biznesi üçün bir ay ərzində mahnı çıxarırlar. Tövsiyə edərdim ki, sırf şəhid və qazilərimizin xatirəsi üçün də layihə üzərində çalışsınlar.
- Doğma şəhərinizdə işləməyə davam edəcəksiniz?
- Mənim irəliyə getməyim üçün deyirlər ki, Bakıya get, orada daha yaxşı olacaq. Mənə isə bu şəhər çox rahat və gözəldir. Hansısa şəhərə getmək planım bu gün yoxdur.
Nəzrin Vahid
