Oktyabrın 18-də Gəncə şəhəri İsaq Cəfərov küçəsində baş verən partlayış nəticəsində dağılmış beşmərtəbəli yaşayış binasının sakinləri Gəncə şəhər İcra Hakimiyyətinin fəaliyyətsizliyindən, eləcə də onların acınacaqlı vəziyyətlərinə tam biganəlik nümayiş etdirməsindən narazılıqlarını bildirirlər.
Gencexeber.az-a daxil olan şikayətə əsasən, zərərçəkmiş ailələr iddia edirlər ki, İcra Hakimiyyəti müvəqqəti yaşamaq üçün kirayə pulu ayrılacağını vəd edib, ailə başçılarının bank rekvizitlərini toplayıb, lakin 20 gündən çox vaxt keçməsinə baxmayaraq heç bir maddi yardım göstərməyib.
“Evimiz dörd blokdan ibarətdir. Partlayışdan sonra üçüncü tamamilə dağılıb, dördüncüdə isə mənzillərə qismən ziyan dəyib. Buna baxmayaraq, bizə heç bir köməklik göstərilmədiyi üçün bəzi insanlar öz mənzillərinə qayıtmağa məcbur olublar. Mənzilimiz dağılmasa idi, biz də qayıdardıq. Nə qədər qohum evində qalmaq olar?”, - zərərçəkənlərdən biri deyir.
Qeyd edək ki, partlayış günü Fövqəladə Hallar Nazirliyinin mütəxəssisləri tərəfindən verilən rəyə əsasən baş vermiş partlayış nəticəsində yaşayış binasının iki blokunda mənzillər yararsız hala düşüb və burada yaşayışın məhdudlaşdırılması məqsədəuyğun hesab edilib.
Həmçinin Gəncə Şəhər İcra Hakimiyyətinin başçısı Niyazi Bayramov partlayış baş verən əraziyə baxış keçirdikdən sonra media mənsublarına müsahibəsində məlumat verib ki, qurum tərəfindən zərərçəkənlərə kirayə mənzillərdə yerləşdirilməsi üçün maddi yardım göstəriləcək.
Sözügedən məsələ ilə bağlı redaksiyamız Gəncə Şəhər İcra Hakimiyyətinə sorğu ünvanlayıb. Qurum cavabında bildirib ki, yaxın zamanda bu haqda məlumat veriləcək.
Cavid Şəmiyev
