Şəmkirli alim Elçin Bədəloğlu Türkiyədəki elmi fəaliyyəti və stomatologiya sahəsində hazırladığı iki cərrahi texnika ilə diqqət çəkir.
Hazırda İstanbul Aydın Universitetində dosent kimi çalışan Elçin Bədəloğlu ağız, diş və çənə cərrahiyyəsi, eləcə də implantologiya sahəsində elmi araşdırmalar aparır. O, öz soyadını daşıyan iki cərrahi texnikanın müəllifidir.
Alim müsahibəsində bildirib ki, əsas tədqiqat istiqamətlərindən biri çənə sümüyünün bərpası və implantologiyadır. Hazırladığı üsulların əsas məqsədi bəzi müalicə proseslərini daha səmərəli təşkil etmək və əməliyyat mərhələlərini azaltmaqdır.
Onun hazırladığı "All-in-One Surgery" yanaşması uyğun klinik hallarda bu mərhələləri bir cərrahi müdaxilədə birləşdirməyə imkan verir.
Alim qeyd edib ki, on ildən artıqdır "Bədəloğlu texnikası" adı ilə tanınan üsullarını Türkiyədə və digər ölkələrdəki mütəxəssislərə öyrədir, bu istiqamətdə ustad dərsləri və elmi təqdimatlar keçirir.
Elçin Bədəloğlu Azərbaycan Tibb Universitetində təhsil aldığı dövrdə tələbə mübadiləsi proqramı ilə İstanbul Universitetinə yollanıb. O, təxminən 280 əlaçı tələbə arasından seçilən 29 nəfərdən biri olub.
Hazırda İstanbul Aydın Universitetində elmi-pedaqoji fəaliyyətini davam etdirən Bədəloğlunun yeddi doktorantı var. Onlardan biri azərbaycanlıdır.
Mənbə: azedu.аz
