Gəncə şəhərində Zəfər Gününə həsr olunmuş kikboksinq üzrə "Qərb Kuboku" keçirilib.
Gencexeber.az məlumat verir ki, yarış oktyabrın 25-də Gəncə Olimpiya İdman Kompleksində baş tutub. Azərbaycan Kikboksinq Federasiyasının rəhbərliyinin və Gəncə-Daşkəsən Regional Gənclər və İdman İdarəsinin dəstəyi ilə təşkil olunan yarışda 32 komandanı təmsil edən 300-ə yaxın idmançı iştirak edib.
Gərgin idman mübarizəsi şəraitində keçən qarşılaşmalar 3 rinq və tatamidə təşkil olunub. Yarışları 28 nəfərdən ibarət hakimlər heyəti idarə edib.
Turnirin təşkilatçısı Azərbaycan Kikboksinq Federasiyasının (AKF) Qərb Regionunun sədri, WAKO-nun beynəlxalq "A" kateqoriyalı hakim Anar Məmmədovdur.
Tədbirin əsas məqsədi Zəfər Gününün tarixi əhəmiyyətini təbliğ etmək, gənc nəslin vətənpərvərlik ruhunda yetişməsinə töhfə vermək, kikboksinq idman növünün regionda inkişafını dəstəkləmək və idmançılar arasında sağlam rəqabət mühitini gücləndirmək olub.
