Beynəlxalq alimlər qrupunun tədqiqatı Göytəpədə yaşamış qədim insanların tikinti ənənələri ilə bağlı qeyri-adi faktı üzə çıxarıb.
Tovuz rayonunda yerləşən Göytəpə qədim yaşayış məskəni ilə bağlı aparılan elmi araşdırmalar maraqlı nəticə ortaya qoyub.
Gencexeber.az xəbər verir ki, Azərbaycan və Yaponiya alimlərinin də iştirak etdiyi beynəlxalq tədqiqat qrupu burada aşkar edilən qədim tikililərin nə qədər müddətdən bir yeniləndiyini araşdırıb.
Alimlər müxtəlif yaşayış qatlarından götürülmüş 45 nümunənin radiokarbon tarixləndirilməsi əsasında müəyyən ediblər ki, Göytəpədə çiy kərpicdən inşa edilən yaşayış tikililəri orta hesabla 11,4 ildən bir yenidən qurulub.
Bu, Neolit dövrünün digər Yaxın Şərq yaşayış məskənləri ilə müqayisədə olduqca qısa müddət hesab edilir.
Maraqlıdır ki, Göytəpədə üst-üstə yerləşən 14 tikinti mərhələsinin izləri müəyyən olunub. Yaşayış məskəninin mədəni təbəqəsinin qalınlığı isə 11 metrə çatır.
Radiokarbon analizlərinə əsasən, burada insanların təxminən eramızdan əvvəl 5650–5460-cı illərdə yaşadığı müəyyən edilib.
Qədim sakinlər dairəvi planlı çiy kərpic evlər tikir, əkinçilik və heyvandarlıqla məşğul olurdular.
Beləliklə, Tovuzda aparılan arxeoloji tədqiqatlar təxminən 8 min il əvvəl insanların evlərini necə və hansı dövrlərlə yenidən qurduqlarını öyrənməyə imkan verir.
