Gəncə şəhərinin Bayan küçəsində yaşayan sakinlər məişət tullantıları üçün nəzərdə tutulan zibil qutularının ərazidən götürülməsindən narazıdırlar.
Gencexeber.az-a daxil olan şikayətlərə görə, 20 ildən artıqdır ki, küçə sakinləri məişət tullantılarını müəyyən edilmiş ərazidə yerləşdirilən zibil qutularına atıblar. Həmin ərazi yaşayış evlərindən təxminən 500 metr məsafədə yerləşsə də, sakinlər bu məsafəni qət etməyə öyrəniblər.
Lakin hazırda həmin konteynerlər təxminən 1 kilometr məsafədə yerləşən əraziyə köçürülüb. Bu vəziyyət xüsusilə yaşlı insanlar və tullantıları əl arabası ilə daşıyan sakinlər üçün ciddi çətinlik yaradır.
Sakinləri narahat edən digər məqam isə əvvəlki zibil qutularının yaxınlığından şəhərin su kanalının keçməsidir. Onlar tullantıların uzaq məsafəyə daşınmasının çətinlik yaratdığını bildirərək, bəzi insanların gələcəkdə zibilləri kanala atmağa məcbur qala biləcəyindən ehtiyat edirlər. Bu isə ərazidə ətraf mühitin çirklənməsi və antisanitar vəziyyətin yaranması riskini artırır.
Bayan küçəsinin sakinləri aidiyyəti qurumlardan zibil qutularının köçürülməsi ilə bağlı qərarın yenidən nəzərdən keçirilməsini, əvvəlki ərazidə və ya sakinlər üçün əlçatan məsafədə tullantı qablarının yerləşdirilməsini xahiş edirlər.
