Gəncə şəhərinin Dədə Qorqud küçəsində elektrik enerjisinin tez-tez kəsilməsi əhalinin narazılığına səbəb olur.
Gencexeber.az-a müraciət edən sakinlərin sözlərinə görə, ərazidə ay ərzində 4-5 dəfə işıqlar sönür. Nəticədə yaşayış binaları, dükanlar işıqsız qalır, svetoforlar fəaliyyətini dayandırır.
Sakinlər bildirirlər ki, elektrik enerjisinin kəsilməsi ilə bağlı yaranan problem dəfələrlə təkrarlansa da, onun birdəfəlik aradan qaldırılması üçün tədbir görülmür.
Gəncəlilərin narazılığını artıran digər məqam isə təmir işlərindən cəmi iki gün sonra elektrik enerjisinin yenidən kəsilməsidir.
Sakinlər aidiyyəti qurumlardan problemin səbəbinin araşdırılmasını, elektrik təchizatında yaranan nasazlıqların birdəfəlik aradan qaldırılmasını və ərazidə dayanıqlı elektrik təminatının yaradılmasını xahiş edirlər.
