Samuxun Burunqovaq kəndində 88 yaşlı qadını qətlə yetirən İntiqam Alıyev və Arzu Alıyevin məhkəmə prosesi başa çatıb.
Qanunsuz şəkildə evə daxil olan Alıyevlər, qadının bədəninin müxtəlif nahiyələrinə əl və ayaqla çoxsaylı zərbələr endiriblər. Arzu və İntiqam qadından pulu saxladığı sandığı açmağı tələb etsələr də, Yahuzə Bəkirova bundan imtina edib. Bu isə cinayətkarları daha da qəzəbləndirib. Nəticədə Alıyevlərin yetirdiyi zərbələr qadının ölümünə səbəb olub.
Qadın öldükdən sonra sandığın qıfılını sındıraraq istintaqa məlum olmayan məbləğdə pulu götürüb hadisə yerindən uzaqlaşıblar.
Bundan başqa, Arzu Alıyev Yahuzə Bəkirovanın evini də yandırıb.
Bir qədər sonra evə qayıdan Arzu Alıyev "Mən nə qələt elədim" deyərək, öz-özünə deyinib. Onun bu sözündən şübhələnən qardaşı Arzu Alıyevi polisə aparıb.
Qeyd edək ki, hadisə baş verən gün Arzu Alıyevin qardaşının xeyir işlə əlaqədar evlərində məclis olub. Yahuzə Bəkirova həmin evə gələrək, digər məclislərə 5 manat, amma Alıyevlərin xeyir işinə 50 manat nəmər yazdıracağını bildirib. Yaşlı qadının məclisə 50 manat nəmər yazdıracağını eşidən İntiqam Alıyev, əmisi oğlu Arzuya "Əgər bu sizin məclisə 50 manat yazdıracaqsa, deməli, evində 3000 manat pulu var" deyib və cinayət niyyətini ortaya qoyub.
Gəncə Ağır Cinayətlər Məhkəməsində keçirilən prosesdə qadının qətlində təqsirləndirilən əmioğlulara hökm oxunub.
Hökmə əsasən, hər iki şəxs 18 il 6 ay müddətinə azadlıqdan məhrum edilib.
