Gəncənin İsaq Cəfərov küçəsində yerləşən beşmərtəbəli yaşayış binasında baş verən partlayışın ildırım vurması nəticəsində meydana gəldiyi ehtimal edilir.
Gencexeber.az-ın əldə etdiyi məlumata əsasən, ümumilikdə 9 mənzilə ziyan dəyib, onlardan 6-sı tamamilə yararsız vəziyyətə düşüb. Bildirilib ki, 5-ci mərtəbədə qalan sakinlər döşəmə dağıldığından 4-cü mərtəbəyə düşüblər.
Sakinlərin sözlərinə görə, öncə güclü şimşək çaxıb. Ardınca isə binada partlayış baş verib.
Qeyd edək ki, ilkin olaraq partlayışın səbəbi kimi qaz sızması göstərilirdi.
09:26
Gəncədə binada baş verən güclü partlayış nəticəsində ölən və xəsarət alan şəxslərin kimliyi məlum olub.
Oxu.Az-ın əldə etdiyi məlumata görə, hadisə zamanı 1962-ci il təvəllüdlü Mehriban Paşayeva və 1980-cı il təvəllüdlü Könül Xudaverdiyeva həlak olub.
1961-ci il təvəllüdlü Bəxtiyar Orucov, 1999-cu il təvəllüdlü Firuzə Yusibova və 2004-cü il təvəllüdlü Nuranə Əliyeva xəsarət alıblar.
09:05
Gəncənin İsaq Cəfərov küçəsində yerləşən beşmərtəbəli yaşayış binasında partlayış baş verib.
Gencexeber.az Fövqəladə Hallar Nazirliyinə istinadən məlumat verir ki, partlayışla əlaqədar Nazirliyin Gəncə Regional Mərkəzi və Dövlət Yanğından Mühafizə Xidmətinin qüvvələri dərhal əraziyə cəlb olunub.
Hadisə yerində əməliyyat şəraiti qiymətləndirilərkən binanın dördüncü mərtəbəsində yerləşən mənzildə partlayış baş verdiyi və dağıntı yarandığı müəyyən edilib.
Əməliyyat şəraitinə uyğun olaraq həyata keçirilmiş operativ xilasetmə əməliyyatı sayəsində dağıntı altından dörd nəfər sağ çıxarılaraq təcili tibbi yardım briqadasına təhvil verilib.
Hadisə nəticəsində iki nəfər həyatını itirib.
Hadisə ilə əlaqədar aidiyyəti qurumlar tərəfindən araşdırma aparılır.
