2025-ci ildə Azərbaycanda 48 546 nikah və 20 675 boşanma qeydə alınıb.
Gencexeber.az bildirir ki, bu barədə Dövlət Statistika Komitəsi (DSK) məlumat yayıb. Bildirilib ki, nikahların sayı əvvəlki illə müqayisədə 962 və ya 1,9 faiz, boşanmaların sayı isə 709 və ya 3,3 faiz azalıb.
Nikahların sayı 2011-ci illə müqayisədə 44,9 faiz azalıb. Həmin il 88 145 nikah qeydə alınmışdı. Boşanmaların sayı isə bu dövrdə 10 747-dən 20 675-ə yüksələrək 92,4 faiz artıb.
Statistikaya əsasən, nikaha daxil olan qadınların orta yaşı 2000-ci ildə 23,6, kişilərin isə 28,4 olub. 2025-ci ildə bu göstəricilər müvafiq olaraq 25,1 və 30,1 yaşa yüksəlib.
Ötən il boşanmaların ən çoxu 10-19 il davam edən nikahlarda qeydə alınıb. Bu müddət ərzində 7 354 nikah pozulub ki, bu da ümumi boşanmaların 35,6 faizini təşkil edir.
Yaş bölgüsünə görə, boşanan qadınlar arasında 30-34 yaş qrupu (5 072 nəfər), kişilər arasında isə 35-39 yaş qrupu (4 844 nəfər) üstünlük təşkil edib.
