Gəncədən olan 20 Yanvar faciəsi şəhidinin məzarı şəhər sakinləri tərəfindən ziyarət olunub.
Gencexeber.az məlumat verir ki, Gəncədə 20 Yanvar faciəsinin şəhidləri yad olunublar. Gəncə sakinləri bu gün səhər saatlarından şəhərin Şəhidlər xiyabanına üz tutub.
Bu zaman 20 Yanvar faciəsinin gəncəli şəhidi Valeri Boqdanovun da məzarı ziyarət olunub. Qəhrəmanımızın əziz xatirəsinə dualar oxunub, qəbrinin önünə gül dəstələri düzülüb.
Qeyd edək ki, Valeri Zakir oğlu Boqdanov 1958-ci ildə Gəncə şəhərində anadan olub. 1990-cı il Qanlı Yanvar hadisələri ərəfəsində o, Bakıda idi. Baş leytenant Boqdanov yanvarın 19-dan 20-nə keçən gecə Bakıda operativ tapşırıqla əməliyyat həyata keçirirdi və bütün gecəni yaralılara kömək edirdi. Yanvarın 20-də səhər tezdən Bakının Tbilisi prospektində Boqdanovun maşını atəşə tutulur. İş yoldaşları onu xəstəxanaya çatdırsalar da, Valerini xilas etmək mümkün olmur.
