Gəncə sakini qanunsuz tikinti aparan şəxslərin ona hədə-qorxu gəlməsi ilə bağlı iddialar səsləndirib.
Gencexeber.az məlumat verir ki, şəhərin yeni salınan Şıxzamanlı qəsəbəsinin Mübariz İbrahimov küçəsində yaşayan qadın qanunsuz tikinti aparan şəxslərin hədələri ilə üzləşib. Buna səbəb onların ərazinin bir tərəfini tamamilə hasara alması olub. O, baş verənlərlə bağlı narahatlığını bildirəndə onu təhqir də ediblər.
Bundan sonra qadın polisə müraciət edib və tikinti işləri dayandırılıb. Ancaq bir müddət sonra həmin şəxslər yenidən işə başlayıblar.
Redaksiyamızın məsələ ilə bağlı sorğusuna DİN-in mətbuat xidmətinin Gəncə regional qrupunun baş inspektoru Eşqin Qasımov bildirib ki, Gəncə Şəhər Baş Polis İdarəsinin əməkdaşları müvafiq qurumların nümayəndələri ilə birlikdə əraziyə baxış keçiriblər, tikintiyə icazə olmadığına görə işlər dayandırılıb.
“Tikinti dərhal dayandırılıb. Qanunsuz hər hansı bir tikinti aparıla bilməz. Məsələ nəzarətdədir”, – E.Qasımov əlavə edib.
