Gəncənin bu avtobusunda sərnişinlərin təhlükəsiz hərəkəti təmin edilmir.
Gencexeber.az-a daxil olan şikayətdə iddia olunur ki, Gəncə ərazisində hərəkət edən 1 saylı marşrut avtobusunun döşəməsində sürücü oturacağının arxasında dəlik əmələ gəlib. Bildirilib ki, onun ətrafında müşahidə edilən çürüklər nəqliyyat vasitəsinin necə qəzalı və təhlükəli vəziyyətdə olduğunu göstərir.
Deşikdən asfalt, habelə fırlanma anını sürətlər qutusundan arxa təkərlərə ötürən kardan mili də görünür. Bu səbəbdən salona əlavə səs-küy daxil olur və onsuz da acınacaqlı mühitdə olan sərnişinlərin akustik rahatlığını daha da pozur.
“Belə avtobus olar? Harada görülüb ki, sərnişinlər avtobusda qorxaraq hərəkət etsinər?” – şikayətçi bildirib.
Qeyd edək ki, Gəncədə ictimai nəqliyyatın keyfiyyəti qənaətbəxş deyil. Belə hadisələr isə vətəndaşların təhlükəsizliyini təmin etmək üçün təcili müdaxiləyə ehtiyac olduğunu bir daha təsdiqləyir.
Xatırladaq ki, bir müddət öncə Prezident İlham Əliyev Gəncədə şəhər nəqliyyatının tamamilə yenilənməsi müjdəsi verib.
