Xəbər verdiyimiz kimi, Gəncədə qanunsuz küçə ticarəti ilə məşğul olanlara qarşı tədbirlər həyata keçirilib.
Gəncə Şəhər İcra Hakimiyyəti tərəfindən yayılan məlumatın son cümləsində “yığılan məhsullar, qanunamüvafiq qaydada akt tərtib edilərək, aidiyyəti üzrə təhvil verilib” cümləsi qeyd olunub. Bu isə qurumun "işçi qrupu" tərəfindən malların müsadirə edilməsi anlamına gəlib.
Sözügedən məsələ ilə bağlı Gencexeber.az-a Gəncə İH tərəfindən bildirildi ki, qanunsuz küçə ticarəti ilə bağlı keçirilən reydlər zamanı şəhərin müxtəlif ərazilərində pərakəndə satışla məşğul olan şəxslərin malları heç bir halda müsadirə edilmir:
"İşçi qrupu"nun üzvləri tərəfindən həmin şəxslərlə izahedici və maarifləndirici söhbət aparılır. Aparılan izahedici söhbətlərə və edilən xəbərdarlığa məhəl qoymayan şəxslər barəsində isə Azərbaycan Respublikasının “İnzibati xətalar məcəlləsinin” 454-cü maddəsinə uyğun olaraq protokollar tərtib edilir. Əksər hallarda, edilən izahedici söhbətlərdən və ya tərtib edilən protokollardan sonra satılan məhsulların yığışdırılması pərakəndə satışla məşğul olan şəxslər tərəfindən təmin edilir.
Elə olmadıqda, məhsullar "İşçi qrupu"n üzvləri tərəfindən akt tərtib edilərək götürülür və aidiyyəti üzrə təhvil verilir (bu hal bir ya iki dəfə reydlərin keçirildiyi ilk həftədə baş verib). Daha sonra isə mütləq şəkildə vətəndaş məhsulu daşındığı yerdən təhvil alır”.
