Gəncə sakinləri ətraf binaların təmir olduğu halda yaşadıqları çoxmərtəbəli tikilinin diqqətdən kənarda qalmasına görə nigarandırlar.
Gencexeber.az-a daxil olan şikayətə əsasən, Yeni Gəncə qəsəbəsində yerləşən 46 və 47-ci binaların təmiri üzrə işlər yekunlaşıb. Tikililərin fasadları və bloklar rənglənib, pəncərə çərçivələrinin kənarları düzəldilib, açıq eyvanlar qapadılıb, yeni giriş qapıları qoyulub və s. işlər görülüb.
Lakin sözügedən ərazidə həmən bu iki doqquzmərtəbəli tikilinin düz arxasında yerləşən 57 nömrəli bina abadlıq işlərindən kənarda qalıb.
“46 və 47-ci bina yaxşı təmir edilib. Orada işlər yekunlaşanda, bizim binaya əl vurmayıb gediblər. Binaların girişləri pis vəziyyətdədir, bəzi mənzillərin daxilinə su axır” - sakin bildirib.
Sözügedən məsələ ilə bağlı redaksiyamız tərəfindən Gəncə Şəhər İcra Hakimiyyətinə ünvanlanan sorğuya cavab olaraq qurumdan bildirilib ki, Gəncə şəhərində olan çoxmənzilli binaların fasadları mərhələli şəkildə yenilənir. Yeni Gəncə qəsəbəsi, 57-ci binan fasadının növbəti mərhələdə yenilənməsi nəzərdə tutulub:
“İşlərin görüləcəyi dəqiq vaxt hələ ki, müəyyən edilməyib”.
