Gəncənin Gülüstan qəsəbəsi, Aydın Nəbiyev küçəsində asfalt örtüyü çöküb.
Gencexeber.az-a bu barədə sakinlər tərəfindən şikayət daxil olub.
Sakinlər bildirirlər ki, sözügedən yol avtomobillərin gediş-gəlişini çətinləşdirir:
“Eyni zamanda, ərazidə heç bir xəbərdaredici nişanın olmaması da qəza şəraitinə səbəb olur. Bu çöküntü ərazidə su-kanalizasiya xətlərinin çəkilməsindən sonra meydana gəlib. Problemin təkrar baş verməməsi üçün aidiyyəti qurumlardan müvafiq tədbirlərin görülməsini tələb edirik”.
Xatırladaq ki, eyni yol ötən ilin noyabr ayında da analoji vəziyyətə düşmüşdü. O zaman aidiyyəti qurumlar tərəfindən təmir işləri aparılsa da, yol yenidən çöküb.
Hazırda sözügedən yol aidiyyəti qurumlar tərəfindən yenidən təmir olunur.
