Xəbər verdiyimiz kimi, Gəncədə sahibsiz itlər üçün tikilən “Yuva” sığınacağı artıq fəaliyyət göstərmir. Sözügedən məsələ ilə bağlı məlumatı redaksiyamıza müəssisənin rəhbəri Yaqub Abbasov bildirib.
Onun sözlərinə görə, Gəncə Şəhər Mənzil Kommunal Təsərrüfatı İstehsalat Birliyi (MKTİB) tərəfindən dörd aya yaxındır işçilərin maaşları və heyvanlar üçün lazım olan məhsullar üçün ödəniş olunmayıb.
Gencexeber.az-a sözügedən məsələyə aydınlıq gətirmək üçün Gəncə şəhər Mənzil Kommunal Təsərrüfatı İstehsalat Birliyinin mətbuat xidməti bildirib ki, şəhərdə sahibsiz küçə heyvanları üçün yaradılan “Yuva” sığınacağı 2023-cü ildə Gəncə İctimai İştirakçılıq Məclisinin ideya və təşəbbüsü, həmçinin Gəncə Şəhər İcra Hakimiyyəti, Gəncə şəhər Kəpəz Bələdiyyəsi və Gəncə şəhər Mənzil Kommunal Təsərrüfatı İstehsalat Birliyinin dəstəyi ilə yaradılıb.
Həmçinin əlavə edilib ki, qurumun büdcəsi toplanan ianələrdən formalaşmalı və öz ehtiyaclarını ödəməli idi:
“İctimai əsaslarla və ianə hesabına formalaşdırılan “Yuva” adlı sığınacağa ilkin olaraq, dəstək məqsədilə Gəncə şəhər Mənzil Kommunal Təsərrüfatı İstehsalat Birliyi tərəfindən 1 ildən çox maddi və texniki yardım göstərilib. Bununla belə, Gəncə şəhər MKTİB-nin rəsmi olaraq “Yuva” adı ilə fəaliyyət göstərən sığınacaqda işçilərin əmək haqqının davamlı ödənilməsi, orada saxlanılan heyvanlar üçün yemək, qısırlaşdırma əməliyyatı üçün narkoz və digər tibbi vasitələrin alınnması üçün heç bir öhdəliyi olmayıb. Bir daha xatırladırıq ki, Gəncə İctimai İştirakçılıq Məclisinin təşəbbüsü ilə sahibsiz küçə heyvanları üçün yaradılan “Yuva” adlı sığınacağın büdcəsi toplanan ianə hesabına formalaşdırılmalıdır”.
