Gəncədə məktəblinin bıçaqlanması ilə bağlı açıqlama verilib. Bu haqda 24 yanvar tarixində Sfera.az-a istinadən məlumat veririk.
Ötən gün 11-ci sinif şagirdinin bıçaq xəsarəti alaraq dünyasını dəyişməsi barədə xəbər paylaşmışdıq. Məsələyə təhsil eksperti Kamran Əsədov münasibət bildirib. O qeyd edib ki, son illər orta məktəblərdə şagirdlər arasında şiddətin artması göz qabağındadır.
“Hazırda ölkənin 4432 orta ümumtəhsil məktəbində 1,6 milyon şagird təhsil alır və hər gün həmin şagirdlərin təlim-tərbiyəsi ilə 150 mindən çox müəllim məşğul olur. Bu, o deməkdir ki, təkcə ümumtəhsil müəssisələrində 2 milyona yaxın insan tədris prosesinin iştirakçısına çevrilir. Bu səbəbdən xoşgəlməz, bədbəxt hadisələr baş verə bilər. Gəncədəki bıçaqlanma nəticəsində bir şagirdin vəfat etməsi də böyük bir itkidir. Etiraf etmək lazımdır ki, Gəncə də kriminal şəhərdir. Bu, birinci hal deyil. Dəfələrlə şagirdlərin bir-birinə kəsici-deşici alətlərlə xəsarət yetirməsinin şahidi olmuşuq”, - deyə ekspert bildirib.
Əsədov, həmçinin əlavə edib ki, məktəblilər qəhrəman kimi nümunə olaraq tariximizdəki hansısa uğurlu şəxsləri yox, cinayət, oğru aləminin məşhur simalarını götürürlər.
“Əksəriyyəti də sosial şəbəkələrdə bu şeylərlə tanış olur və təbliğ edir. Siz artıq aşağı sinif şagirdlərinin üzərində belə soyuq, kəsici-deşici alətlər tapa bilərsiniz. Bir məktəbli niyə o yaşda özünü müdafiə üçün üzərində bu cür alətlər daşımalıdır? Bu, yolverilməzdir. Bizim dərsliklərimiz şagirdlərdə nümunəvi vətəndaş obrazı yarada bilmir.”
Onun sözlərinə görə, bu tipli hadisələrin qarşısının alınması üçün maarifləndirmə tədbirləri həyata keçirilməli və nəzarət mexanizmi gücləndirilməlidir.
“Məktəblərin yaxınlığında mütəmadi olaraq, post patrul xidmətinin əməkdaşları reydlər aparmalıdırlar. Həmin ərazilərdə bu tipli alətlərin satışına nəzarət olunmalıdır. Şagirdlərin üstünün yoxlanılmasına ciddi ehtiyac var. Onlar psixoloji testlərə cəlb edilməlidirlər. Psixoloji narahatlığı olan uşaqlara xüsusi təlimlər keçilməlidir. Bu cəhətdən məktəb psixoloqlarının üstünə böyük yük düşür. Əgər iki eyni yaşda məktəblinin arasında konflikt varsa, deməli, onlar arasında kommunikasiyanın yaranmasında problem mövcuddur. Bu da təhsil mühitinin aşağı düşməsi ilə əlaqədardır. Deməli, şagirdlər o qədər bikardırlar ki, boş vaxtlarını bu tipli məsələlərlə doldurmağa çalışırlar.”
