Gəncəçay yenə çirklənmə problemi ilə üz-üzə qalıb.
Gencexeber.az məlumat verir ki, sözügedən hal Gəncəçay çayının şəhər ərazisindən keçən hissəsində müşahidə edilir. Gəncə sakinin redaksiyamıza ünvanladığı videogörüntülərdən də aydın olur ki, çayın məcrasında müxtəlif növ məişət və digər təyinatlı tullantıların yığılması məyusedici mənzərə yaradır.
Şikayətçinin sözlərinə görə, bu acınacaqlı vəziyyət ətraf mühitə zərər vurmaqla yanaşı, şəhər sakinləri və turistlər arasında da son dərəcə mənfi təəssürat yaradır: “Gəncə Azərbaycanın ikinci ən böyük şəhəri kimi təmizlik və abadlıq məsələlərinə lazımi diqqət yetirilmədiyi üçün cəlbedici imicini itirmək riski ilə üzləşir”.
Bildirilib ki, hakimiyyət orqanları tərəfindən adekvat tədbirlərin görülməməsi ətraf mühitin mühafizəsi və təbii sərvətlərin qorunub saxlanmasını illərdir gözləyən vətəndaşların narazılığına və narahatlığına səbəb olur.
