Gəncə şəhər Mənzil Kommunal Təsərrüfatı İstehsalat Birliyi (MKTİB) tərəfindən şəhər ərazisində aparılan kompleks təmizlik işləri davam etdirilir.
Gencexeber.az məlumat verir ki, bu dəfə qurumun canlı qüvvə və texnikaları vasitəsilə şəhərin 17 saylı orta məktəbinin ətrafında və Şah İsmayıl Xətai prospektində yerləşən şadlıq sarayının qarşısındakı yaşayış binalarının ətrafında təmizlik işləri həyata keçirilib.
Aparılan monitorinqlər nəticəsində ərazidə yaşayan və sahibkarlıq fəaliyyəti göstərən vətəndaşların məsuliyyətsiz davranışı nəticəsində adıçəkilən ünvanda məişət və təmir qalıqlarından ibarət tullantıların hara gəldi atılması nəticəsində ortaya çıxan xoşagəlməz mənzərə aradan qaldırılıb.
Yığılan tullantıların ərazidən daşınması təmin edilib. Sözügedən ərazilər məişət tullantıları ilə yanaşı, alaq otlarından, eləcə də toz-torpaqdan təmizlənib, mövcud konteynerlərin ətrafında səliqə-sahman yaradılıb.
MKTİB bir daha sakinlərdən yaradılan təmizliyə riayət edilməsini və məişət tullantılarını təyin olunan yerlərə atılmasını xahiş edir.
[caption id="attachment_77350" align="alignnone" width="696"]
[/caption]
