2024-cü ilin dekabr ayında astronomlar tərəfindən kəşf olunmuş 2024-YR4 asteroidi 2032-ci ildə Yer planeti ilə toqquşa bilər.
Trend.аz rus KİV-lərinə istinadən xəbər verir ki, bunu rusiyalı astronom, “Ka-Dar” rəsədxanasının rəhbəri Stas Korotkiy bildirib.
“Hal-hazırda onun Yer planeti ilə toqquşması ehtimalı müxtəlif strukturlar tərəfindən 0,5 - 6 faiz aralığında qiymətləndirilir. Altı faiz deyəndə - yəni vəziyyətin inkişafına dair 16 variant var ki, bunlardan biri toqquşma variantıdır”, - astronom bildirib.
Alimin sözlərinə görə, bu proqnozlarda qeyri-müəyyənliyin olması asteroidin müşahidə müddətinin qısa olması ilə əlaqəlidir.
Qeyd edilir ki, asteroidin 22 dekabr 2032-ci ildə Yerlə toqquşması ehtimalı 6 faizdir ki, bu da 2004-cü ildə Apofisin kəşf olunmasından bəri ən yüksək proqnoz göstəricisidir. Sözügedən nəhəng asteroidin isə 2029-cu ilin aprel ayında Yerdən 30 min kilometr uzaqlıqdan keçəcəyi fərz edilir.
