Xəbər verdiyimiz kimi, sentyabrın 28-dən Gəncədə "BakuBus" MMC-nin istismarına verilmiş marşrut xətləri fəaliyyətə başlayıb. Lakin sərnişinlər bu yenilikdən ciddi narazılıq edirlər. Şikayətlər sırasında dayanacaqlar arasındakı uzun məsafələr, avtobusların intervalı və bir çox digər məsələlər yer alır.
"BakuBus" MMC tərəfindən Gencexeber.az-a yaranmış narazılıqlarla bağlı açıqlama verilib.
Sərnişindaşıma şirkəti tərəfindən bildirilib ki, Gəncə şəhərində istismar məqsədilə "BakuBus" MMC-nin Gəncə Avtoparkına 280 müasir və komfortlu avtobus gətirilib. Hazırda mərhələli şəkildə şəhərdə xidmət göstərən bütün avtobusların əvəzlənməsi həyata keçirilir.
Dəyişikliklərin miqyasını, həmçinin ölkənin 7 şəhərində təşkil olunan III MDB Oyunlarını, eləcə də yarışların mərkəzi olaraq Gəncənin seçilməsini nəzərə alaraq, avtobusların istifadəyə verilməsi mərhələli şəkildə aparılır. Bu səbəbdən intervallarda qısamüddətli gecikmələr müşahidə olunur. Prosesin bir həftə ərzində tam yekunlaşacağı gözlənilir.
Qeyd edilib ki, avtobuslarda nağdsız ödənişlər zamanı da bəzi çətinliklər yaranır:
"Səbəb sərnişinlərin bonus və ya digər qeyri-bank kartlarından istifadə etməsidir. Avtobuslarda quraşdırılmış cihazlar bu kartları təhlükə kimi qəbul etdiyindən ödəniş sistemində müvəqqəti problemlər yarana bilir. Səyahətinizi daha rahat və fasiləsiz etmək üçün ödənişlərinizi yalnız "CityCard", "CityCard Azerbaijan" mobil tətbiqi, istənilən bank kartı, həmçinin "Apple Pay" və "Google Pay" vasitəsilə həyata keçirməyinizi xahiş edirik".
"MDB Oyunları davam etdiyi müddətdə sərnişinlərdən anlayış göstərmələrini xahiş edirik. Yaranan müvəqqəti narahatlıqlara görə bütün sərnisişinlərdən üzr istəyirik", - "BakuBus" MMC tərəfindən bildirilib.
