Gəncədə assosiasiyalardan birinin filialı açılıb. Bu haqda 7 dekabr tarixində Regional Təhsil İdarəsinə istinadən məlumat veririk.
Azərbaycan Gənc Müəllimlər Assosiasiyasının (AGMA) Nizami yurdunda ofisi fəaliyyətə başlayıb. Məqsəd təhsildə innovasiyalarla bağlı gənc müəllimlər arasında əməkdaşlığın inkişafı, onların maarifləndirilməsinə dəstək vermək, gənc müəllimləri bir arada birləşdirən şəbəkələşməni gücləndirmək, vahid strukturlaşmış mexanizm və idarəetmə sistemi yaratmaq, Assosiasiya əlaqələrini və əməkdaşlıq imkanlarını qurmaqdır.
Açılış mərasimində Gəncə-Daşkəsən Regional Təhsil İdarəsinin müdiri Anar Qədiməliyev, Gənclər və İdman İdarəsinin rəisi İntiqam Hüseynov, AGMA-nın sədri Rüfət Əsədzadə, Gənclər Evinin direktoru Amil Qurbanov və digər qonaqlar iştirak ediblər.
Tədbirdən sonra gənc müəllimlərlə görüş keçirilib. Burada çıxışların ardınca maarifləndirici film nümayiş olunub.
