Gəncədə universitet müəllimi məhkəməyə verilib. Bu haqda 28 fevral tarixində Qafqazinfo-ya istinadən məlumat veririk.
Şəhər Məhkəməsində ADAU-nun Yer quruluşu kafedrasının 54 yaşlı baş müəllimi Təvəkkül Sadıqov barəsindəki xüsusi ittiham qaydasında şikayətə baxılıb. Kafedranın müdiri Azər Xəlilov müəllimin sosial şəbəkələrdə paylaşımlar edərək onu təhqir etdiyini, ünvanına böhtanlar səsləndirdiyini iddia edib. Aqrar elmləri üzrə fəlsəfə doktoru olan Xəlilov Sadıqovun Cinayət Məcəlləsinin tələbinə uyğun şəkildə cəzalandırılmasını istəyib.
Məhkəmədə baş müəllimin kafedra müdiri haqqında yazdığı statuslar və şərhlər elan olunub. Məlum olub ki, Sadıqov kafedra müdirinin siyasi mənsubiyyəti, fəaliyyəti ilə bağlı müxtəlif fikirlər yazıb, onun “5-ci kolon”a xidmət etdiyini iddia edib.
Müəllim ifadəsində yazdıqları fikirləri etiraf edib və kafedra müdirini təhqir etmək fikrində olmadığını deyib. O, Xəlilovun dərs saatlarını düzgün bölüşdürmədiyini və ona qarşı qərəzli münasibət bəslədiyini bildirib.
Gəncə Şəhər Məhkəməsində keçirilən prosesin yekununda Sadıqov “Təhqir” maddəsi ilə təqsirli bilinərək 1500 manat məbləğində cərimə edilib.
