O qanlı-qadalı günlərdən bizi nə az nə çox, düz 35 illik zaman kəsiyi ayırır. İllər keçsə də, həmin gecə unudulmur.
20 Yanvar gecəsinin acısını yaşamış, eyni zamanda şahidi olmuş Yevlax qazisi Cahid Nəbiyev bizim.media.аz-a həmin hadisələri ürək ağrısı ilə danışıb.
Həmin illərdə Cahid Nəbiyev İqtisadiyyat Universitetinin 2-ci kurs tələbəsi olub. Bir neçə gün onlar tələbə yoldaşları ilə küçələrə axışıb, “Azadlıq” şüarı ilə çıxış edirlərmiş. Yenidən 19-u axşam saatlarında toplaşaraq heç nədən qorxmayaraq Bakının azadlığı uğrunda mübarizəyə qoşulublar.
Bu zaman Sovet ordusunun Bakıya daxil olması xəbərini eşidiblər:
“Gecə saatlarında küçəyə toplaşmışdıq. Eşitdik ki, keçmiş Sovet ordusu tanklarla Bakının bir neçə ərazisindən daxil olub. Biz yoldaşlarla “Gənclik” metrosu istiqamətinə getdik. Tofiq Bəhramov adına stadiona çatanda artıq başımızın üzərindən güllələrin yağdığını gördük. Amma bu bizi qorxutmadı. Daha da irəliyə getmək qərarına gəldik və artıq güllələr insanlara tuşlanmışdı. Bir qədər da irəliyə getmək istəyən zaman çiynimdən yaralandığımı gördüm.
Dayanmadan yaradan qan axırdı. Yenə də özümü itirmədən kənara çəkilməyi bacardım”, - deyə o qeyd edib.
Cahid Nəbiyevin sözlərinə görə o, üzünü arxaya çevirmək istədiyi zaman dəhşətə gəlib. Görüb ki, rus əsgərləri yerə yıxılan yaralıları bir-bir yoxlayıb içərilərində sağ qalanlara qarşı vəhşicəsinə qətliam törədirlər. Heç kimi sağ buraxmırlar.
Faciənin şahidi deyib ki, yaralı halda iki gənc qazini ərazidən çıxararaq tez avtomobilə yerləşdirib və birgə xəstəxanaya yollanıblar. “Semaşko” xəstəxanasına gedən zaman yenidən avtomobil atəşə tutulub. Xəstəxanaya daxil olanda isə lap dəhşətə gəlib. Xəstəxananın içərisi və həyəti yaralılarla dolu olub. Həkimlər yaralı Cahidin də həyatını xilas ediblər. Qazinin qanaxması dayandırılıb və əməliyyat olunub.
Cahid Nəbiyevin sözlərinə görə onlar xəstəxanada təzyiqlərə də məruz qalıblar:
“İlk 10 günlükdə mülkü geyimdə olan şəxslər, yəni ruslar izahat almaq istəyirdilər. Məqsəd bizi həbsxanaya saldırıb işgəncə vermək idi. Amma mərd, qorxmaz xalqımız bir olub buna izin vermədi. Həmin şəxsləri xəstəxananın ərazisindən uzaqlaşdırıb binanın 4 tərəfini mühasirəyə alaraq qorumağa başladılar.
Maraqlısı ondadır ki, azadlıq yolunda toplaşan həmin insanları idarə edən, yönləndirən heç kim yox idi. Vətəndaşlarda qeyri-ixtiyari azadlıq ruhu yaranmışdı və heç nədən qorxmurdular. Bu həqiqətən də istiqlal yolunun ilk zirvəsi, milli şüurun oyanış günü idi”.
Onu da qeyd edək ki, Cahid Nəbiyev Yevlax rayonunda yeganə 20 Yanvar qazisidir.
