Gəncədə 101 yaşlı ağsaqqal hələ də əmək fəaliyyəti ilə məşğuldur. Bu haqda 28 fevral tarixində AzTV-yə istinadən məlumat veririk.
101 yaşını qeyd edən Tofiq İsmayılov 24 fevral 1922-ci ildə Gəncədə anadan olub. O, uşaqlıq və gənclik illərini elm və idmana həsr edib. Ağsaqqal II Dünya müharibəsində də iştirak edib. Leytenant Tofiq İsmayılov müharibə bitdikdən sonra doğma şəhərinə qayıdıb.
Bundan sonra Tofiq kişi ailə həyatı qurub, mədəniyyət sahəsində əmək fəaliyyətinə başlayıb. O, təqaüdə kimi Gəncə Mədəniyyət evinin direktoru işləyib. 2005-ci ildən isə 101 yaşlı ağsaqqalımız Gəncə şəhər veteranlar şurasının sədr müavinidir.
Tofiq İsmayılov sağlam və gümrah olmasını 3 qızıl qaydanı gözləməsi ilə izah edir:
“Hər səhər duranda idmanla məşğul olmaq lazımdır. Çünki insanın bədəni açılır, qan dövranı hərəkətə gəlir. İnsan gümrah olur. Çox vaxt piyada gəz, avtobusdan çox istifadə etmə. İkinci əməl odur ki, ailədə səmimiyyət olmalıdır.
İnsanın sağlamlığı öz əlindədir. Yaşamaq istəyirsənsə, öz canına qulaq as”.
