Almaniyanın Zaltskotten şəhərində kikboksinq üzrə keçirilən beynəlxalq "WAKO Kickboxing 2026 German Open" yarışında 19 yaşlı Rəşad Vəliyev qələbə qazanıb.
Gencexeber.az-ın məlumatına görə, 63,5 kiloqram çəki dərəcəsində çıxış edən gənc idmançı bütün rəqiblərini məğlub edərək fəxri kürsünün ən yüksək pilləsinə qalxıb.
Göstərdiyi yüksək nəticəyə görə Rəşad Vəliyev yaşadığı Zaltskotten şəhərinin meri Ulrix Berqer tərəfindən də təltif olunub.
Qeyd edək ki, əslən Gəncə şəhərindən olan Rəşad Vəliyev 9 ildir Almaniyada yaşayır. O, 2024-cü ildə də kikboksinq üzrə Almaniya çempionu tituluna sahib çıxıb. Uğurlu çıxışlarına görə Zaltskotten şəhərində "İlin idmançısı" adına da layiq görülüb.
Hazırda o, "Karl Heinz" klinikasında təhsil alır və paralel olaraq çalışır. Rəşad burada tibb sahəsi üzrə "Ausbildung" proqramı çərçivəsində burun-boğaz ixtisası üzrə həm nəzəri biliklər əldə edir, həm də praktiki təcrübə qazanır.
